Isumat.com/8:51AM, November 27, 2020
An kalipayan hin usa nga pamilya nahimo nga mapait nga trahedya han malumos an ira kaupod nga menor de edad samtang nangangarigos ha usa nga resort ha Abuyog, Leyte kakulop, Nobyembre 26, 2020.
Sumala han report han Abuyog PNP Station, nakakarawat hira hin tawag kun diin an impormante in nagsumat nga may insidente hin kalumos hin usa nga bata ha swimming pool han El Maestro Pool and Beach Resort, Brgy Malaguikay, Abuyog.
Subay han inisyal nga imbestigasyon banda alas 6 han kulop, an tag-iya han resort in nagsudoy palibot han swimming pool ug iya nasipatan nga may tawo ha sag-od han karigusan ngan sugad sugad nga deri na nagi-os. Kadagmitan nga gintawag han tag-iya an pamilya han biktima basi manginano.
Samtang ginpapaningkamutan nga masalbar an bata, tumawag gihap hira ha Abuyog Rescue Unit ngan ha gilayon gindara an biktima ha District Hospital pero igindeklarar han mga doktor nga Dead on Arrival an biktima.
An nalumos in residente han Mayorga, Leyte, sumala pa han mga imbestigador. #
