Isumat.com/Hunyo 22, 2023
Nagpapadayon an kadiskarel han pwersa han mga rebelde nga kumunista ha aton dapit tungod han kadiskubre ngan karekupo han militar hin mga armas ngan bomba ha Brgy Agsaman, Jipapad, Eastern Samar hadton Hunyo 18, 2023.
Subay han report han Philippine Army, an nakuha nga mga armas in ginlalakipan hin duha nga AK47 rifles, usa nga M14 rifle, usa nga shotgun ngan lima nga Anti-personnel mines. Nakuha gihapon han mga tropa han gobyerno in magkalainlain nga mga bala.
Antis hini nga operasyon, usa nga Political Instructor han Sub-Regional Committee Arctic han CPP-NPA Eastern Visayas an sumurender ha militar ngan iya iginsumat kun diin an lugar nga ginhipusan han iya ka-updanan han mga armas ngan bomba.
Kadagmitan ginkadto han kasundaluhan an lugar ngan ira nadiskubre an nasabi nga mga armas.
An nasabi nga Political Instructor han NPA in sumurender hadton Hunyo 18 ha 52nd Infantry Battalion ha Brgy Dao, Oras, E. Samar kun diin iya igintubyan an iya armas nga kalibre 45 nga pistola.
Kasumpay hini, iginpatapod han militar nga deri hira mahunong ha operasyon kontra han mga rebelde samtang iginpapadayon an mga aktibidadis paghatag hin mga proyekto ha tay-aw nga mga barangay.
Utro nanawagan an AFP ha mga rebelde nga adto pa ha kabubkiran nga bumalik na ha panig han gobyerno basi makatagamtam han mga benipisyo ngan maka-agom han mamurayaw nga kinabuhi upod an ira tagsatagsa nga pamilya.#
