Isumat.com/Hunyo 22, 2023
Nagin malinangpuson an operasyon han mga tinubyanan han balaud han makarekupo hira hin dako nga kantidad hin iligal nga droga ngan ka-aresto han suspetsado dida han gab-i han Hunyo 20, 2023 ha Brgy 95-A, Caibaan, Tacloban City.
Ha report han PNP Regional Office, ginkilala an suspetsado nga hi alyas Montoy, 35 anyos, nag-uukoy han nasabi nga lugar.
An operasyon han mga elemento han Tacloban City Police Station 2 ngan PDEA Region 8 an nagresulta han kadakop han suspetsado ngan karekupo hin pira ka sachet hin gin-aalegar shabu may timbang nga 110 gramos ngan nagkakantidad hin 748 mil pesos.
Samtang ha iba nga anti-illegal drugs operation, nadakop an suspetsado nga hi Percy Gabito ha Brgy 8, Lawaan, E. Samar pasado alas 4 han kulop, Hunyo 21, 2023.
Nakumpiskar ha iya in 13 ka sachet hin gintotoohan nga shabu may timbang nga 5 gramos ngan balor hin 34 mil pesos.
An nagdumara han operasyon an mga personales han Lawaan PNP, Provincial PNP Drug Enforcement Unit ngan PDEA-Eastern Samar.
Ha luyo nga bahin, an pwersa han Biliran PNP ngan PDEA-Biliran Province in naka-aresto gin gin-aalegar nga drug personality ha buy-bust operation kakulop, Hunyo 21, 2023.
Alas 4:15 han kulop han himoon an operasyon kun diin arestado an suspetsado nga hi Bryan Sarsosa. Ini nga suspetsado in sumurender na hadto tungod han paghidabi han iligal nga droga pero bumalik ha iligal nga aktibidad.
Nakuha tikang han suspek in duha ka sachet hin gin-aalegar shabu balor usa ka yukot ka pesos.
Didto naman ha Brgy San Juan, Sta Rita, Samar, nadakop an suspetsado nga hi Alfred Luna dida han buy-bust operation pasado alas 12 han maagahon, Hunyo 21, 2023.
Nakumpiskar tikang kan Luna an gin-aalegar shabu may timbang nga 5 gramos ngan balor hin 35 mil pesos.
An mga suspetsado han magkalainlain nga insidente in aada ha kustudiya han kapulisan ha tagsatagsa nga lugar ngan nakatalaan umatubang hin kaso kasumpay han pakatalapas han balaud kontra han iligal nga droga. #
