Isumat.com/Setyembre 22, 2022
Nabungkag in usa nga drug den ngan na-aresto in unom nga suspetsado dida han magkalain nga anti illegal drugs operation ha Sta Rita, Samar ngan Tacloban City.
Hadton Setyembre 19, 2022, an mga operatiba han Philipine Drug Enforcement Agency (PDEA) an nagdumara hin buy-bust operation alas 7:45 han gab-i ha Brgy Caticugan, Sta Rita Samar kun diin na-aresto an mga gintatahapan nga hira Christian Ojalaes, nga amo an gin-aalegar nga nagpapalakat han drug den; ug an upat nga iya bisita hadto nga takna ginkilala nga hira Noel Lacaba, Marlon Ojales, Danny Amiscual ngan Jomar Lanigao.
An mga otoridad in nakarekupo tikang han mga suspetsado hin unom ka sachet hin gintotoohan nga shabu kantidad hin 68 Mil pesos.
Samtang, dida han alas 2 han maagahon, Setyembre 22, 2022, naghimo hin operasyon kontra iligal nga droga an mga elemento han Tacloban City PNP Drug Enforcement Unit ha By-pass Road, Brgy 95, Caibaan, Tacloban City.
Nasikop an suspetsado nga hi Dionnelmel Hermata, 32 anyos, residente han Brgy 108, Tacloban. Nakuha tikang ha iya in 9 ka sachet hin gin-aalegar nga droga upod na an buy-bust money.
An mga suspetsado han magkalain nga mga operasyon in nakapaslak na ha karsel ngan nakatalaan umatubang han mga kaso kontra ha ira. #
