Isumat.com/2:08PM,May 1,2020
Deri mahilalakip ha General Community Quarantine (GCQ) an mga bungto han Burauen, Leyte ug Tarangnan, Samar. Ini in dara han mga nag positibo nga mga tawo ha ira lugar han COVID-19 ug padayon nga monitoring ngan pagkuha hin swab samples han mga iginkahibalag nga mga tawo han positive cases.
Hi Burauen Mayor Juanito Renomeron in nagdesisyon nga igpapabilin an Restrictive Community Quarantine ha iya munisipalidad tobtob Mayo 15. Ini nga iya kamanduan in subay han ginkasarabutan han Inter-Agency Task Force ha ira bungto ha panuyo nga kabalabgan an pagsarang pa han corona virus.
Kun aton manunumduman, duha na nga residente han Burauen an nagin positibo han kagaw ug pira pa nga close contacts nira an ginkuhaan hin swab samples ngan naghuhulat han resulta. Dara hini, magpapabilin an istrikto nga pagbantay sugad han border control points, liquor ban, curfew, ngan pagdakop han mga nakakasupak han kwarentina.
An duha nga barangay kun diin nagtitikang an mga pasyente in naka Total Lockdown ug an LGU an naghahatag han ira pagkaon ngan iba pa nga panginahanglan.
Didto naman ha Samar, naghangyo hi Governor Michael Tan ha Regional IATF nga igpabilin ha ECQ an Tarangnan bisan pa man kun an lalawigan in magpapatuman na han GCQ tikang yana nga adlaw. Sumala kan Tan, kinahanglan igpadayon an mahugot nga pagbantay han bungto dara han kataragman han virus kun diin siyam na ka tawo didto an natapnan.
Nagpahayag pa an amay han lalawigan nga 301 ka tawo na ha Tarangnan an nakuhaan hin swab samples para han laboratory testing ngan mayda pa iba an nakatalaan kuhaan hin samples.
Iginpatapod naman ni Tan an padayon nga paghatag hin ayuda ha Tarangnan ug tobtob kakulop, nakagpadangat na an probinsya hin syete mil nga food packs ngadto han bungto.
Usa na ka semana an nakalabay, an Tarangnan in iginpa-ilarum ha Total Lockdown ni Mayor Arnel Tan dara han community transmission han virus ha iya bungto.
Tinikangan yana nga adlaw, Mayo 1, an bug-os nga Eastern Visayas in aada na ha GCQ subay han kamanduan han Malakanyang.
An na-iiba la nga kahimtang amo an didto ha Burauen ngan Tarangnan dara han ira mga residente nga natapnan ngan padayon nga contact tracing. #
