Isumat.com/ Nobyembre 14, 2022
Nahipaslak ha karsel in usa nga barangay kapitan ha Basey, Samar katapos nga iya pusilon ngan mamatay an hubog nga iya kabarangay nga nakaka-arimutaw ha ira lugar.
An namatay in ginkilala nga hi Rodel Lapinig, 32 anyos, waray asawa ngan parag-uma; samtang an suspetsado in ginkilala nga hi Venerando Bacayo, 57 anyos, inasaw-an, ngan Barangay Chairman han San Agustin, Basey, Samar.
Hadton gab-i han Nobyembre 13, 2022, igin-alegar nga hi Lapinig in hubog ngan segi an pasoy-pasoy ha ira barangay bitbit in sundang nga nagin kawsa han ka-alarma ngan pakaribok ha ira lugar.
Komo amay han barangay, hi Bacayo in nanalinguha nga sawayon ngan pakalmahon hi Lapinig, pero imbes nga sumugot, ginguli-atan lugod niya an kapitan hin pagsering, “Segi Kap, pusila ako! Pusila !!!.”
Dida hini, ginbulnot han suspetsado in usa nga pistola ngan pinusil hi Lapinig nga naigo ha iya ulo, rason han iya kamatayon dida mismo ha lugar han insidente.
Paghagos hin pira ka minutos, boluntaryo nga nagtubyan han iya kalugaringon hi Bacayo ngadto ha Basey Municipal Police Station. #
