an mga bala han NPA nga narekupo han militar

Isumat.com/ Nobyembre 21, 2022

Duha nga mga rebelde nga kumunista an naawat an kinabuhi ngan tulo han ira mga kaupdanan an nagkadadakop ha engkwentro kontra han mga kaapi han Philippine Army ha KM9, Brgy Happy Village, San Isidro, Northern Samar hadton Nobyembre 18, 2022.

Ha impormasyon tikang ha 803rd Infantry Brigade han Philippine Army, natabo an agway pasado alas 12 han udto hito nga petsa ngan humagos hin 15 minutos an balyu-ay hin bala han magkaluyo nga panig.

Labot la han duha nga terorista nga namatay ngan tulo nga nadakop, nakakuha gihapon an mga sundalo tikang han lugar han insidente hin personal nga mga gamit, kadam-an nga mga bala ngan subersisbo nga mga dokumento.

Tobtob han ginsusurat ini nga notisya, waray pa igpahayag han militar an pangilal-an han mga rebelde nga nagkamamatay ngan nagkadadakop.

Antis ini nga panhitabo, an mga kasundaluhan in nakasagap hin report tikang han mga baryuhanon nga may armado nga grupo didto han mao nga lugar nga nangingikil hin kwarta tikang han mga sibilyan. Kadagmitan pumakadto an mga tropa han gobyerno, pero han harani na hira han nasabi nga lugar, ginpa-uranan hira hin bala han mga rebelde ngan dida nagtikang an aragway.

Waray nahireport nga namatay o nasamaran ha panig han gobyerno, pahayag pa han report.

Gintotoohan nga an mga rebelde in kaapi han Front Committee 2 ngan Sub-Regional Guerilla Unit han Sub-Committee Emporium han Eastern Visayas Regional Party Committee han CPP-NPA-NDF.

Sumala han militar, ini nga grupo amo an pirmi namomonitor nga nangingikil hin kwarta ngan pagkaon sugad man nagpipinanhadlukon han katawhan hin pira nga tay-aw nga lugar ha Northern Samar.

Nanawagan naman an Philippine Army ha mga rebelde nga igtubyan ha gobyerno an mga samaran nga ira ka-urusa basi matambal hira ha hospital, kadungan han pag-awhag nga sumurender na basi makatagamtam han mga benepisyo tikang ha gobyerno ngan magkaada hin mahimyang nga kinabuhi.#