Isumat.com/8:09PM, June 8, 2020
53 na katawo an natapnan han corona virus ha Sinirangan Bisayas. Ini in katapos la igpahayag han DOH-Regional Office nga may duha ka tawo an bag-o nga nag positibo han virus.
Hi EV Patient # 52 in lalaki nga taga Tarangnan, Samar nga nag-eedad hin 22 anyos. Pero ini nga bag-o nga kaso ha Tarangnan in posible nga ha iba nga lugar hiya katapni. Kay ini nga lalaki in tikang ha Cebu kun diin na-stranded hiya han lockdown. Naka-uli hiya ha Tarangnan hadton Hunyo 1, 2020 ngan ginkuhaan hin swab sample labi na kay tikang hiya hin lugar nga damo an nadarihigan han kagaw.
An Tarangnan in may community transmission han virus tikang pa hadton Marso kun diin sobra na 20 nga residente han bungto an natapnan. Pero ini nga bag-o nga kaso in posible magdalan na liwat hin bag-o nga problema dida han deri pa nakakatalwas nga munisipalidad han covid-19.
Ha luyo nga bahin, hi EV Patient # 53 in taga Abuyog, Leyte. Hiya in 34 anyos nga OFW ngan mister ni EV Patient # 42 nga taga Abuyog gihapon. Hira in magkadungan pagbyahe han eroplano nga umabot ha Tacloban Airport hadton Mayo 27, 2020.
Ini nga mga resulta han confirmatory tests in tikang han sobra 400 nga samples ha EVRTC ngan 82 nga samples nga ginproseso ha Divine Word Hospital.
Hapagkayana, mayda ginmomonitor nga 1,585 Suspected Cases denhi ha Rehiyon Otso. # (KEVIN SIOSANA)
