(File photo you tuibe-air source military)

Isumat.com/2:32PM, June 8, 2020

Padayon nga ginlalanat han mga tropa han gobyerno an mga rebelde nga kumunista nga ira iginka-aragway kanina han maagahon ha Mondragon, Northern Samar.

Subay han inisyal nga impormasyon nga nahikay han Isumat.com, kanina han pasado alas 2 han maagahon, iginkasurapo han mga sundalo han 803rd Infantry Brigade an mga kaapi han New Peoples’ Army ha tay-aw nga lugar ha parte han kalsada han Mondragon tikadto ha bungto han Silvino Lobos.

Tobtob han ginsusurat ini nga notisya, waray pa impormasyon kun mayda ba nasamaran o namatay dida hini nga engkwentro. Nagsering an surok han impormasyon nga nagin mapaso ngan pwersado ini nga away kay an militar in nangaro pa hin suporta tikang ha Philippine Air Force pinaagi han paggamit hin military choppers.

An militar in nag-aaliskay yana han hagrani nga kabubkiran basi mahalpat an nangiskapo nga mga rebelde.

Nagpahayag an militar nga an mga rebelde in kaapi han Sub-Regional Committee Emporium han CPP-NPA.

Han nag-agi nga semana usa nga lider han NPA ha Catarman an namatay dida hin usa nga enkwentro. Sumala han Philippine Army ini nga rebel leader in ginkilala nga hi Allan Aguilando. Pinanhimuwa naman ini han militante nga grupo nga nagsering nga lider hin mga parag-uma ngan deri rebelde an namatay. #