Isumat.com/Hunyo 27, 2023
Ha panlimbasog nga umuswag pa an kapas han mga atleta han Borongan City, makikiglantugi an mga Boronganon dida han ti-arabot nga 2K Open Water Swimming (Swimming Junkie Challenge) ha Caramoan, Camarines Sur hiton Uktubre yana nga tuig.
Ini an iginpahayag ni Rupert Ambil, an City Sports Coordinadotr ngan City Information Officer katapos la han gindumara nga seminar ngan training didto han mao nga syudad hini nga sports event.
Dida han Hunyo 24, an National Coach han Open Water Swimming ngan SwimJunkie Founder Betsy Medalla an nagtutdo han kinaadman ngan mga estratehiya han open swimming ngadto han batan-on nga mga partisipante.
Gin-aghat ni Medalla an mga partisipante nga magpursige ha pag-ensayo basi magkaada hin bastante nga kusog ngan kama-ilob hini nga sport labi na nga ginhihimo an kompetisyon ha kadagatan ngan dos kilometros an paprumba ha paglangoy.
Igin-esplikar naman ni Ambil nga angayan gud nga magkaada hin open water swimmers an Borongan kay naatubang hin kadagatan an lugar ngan damo an katubigan nga puede pag-ensayuhan.
Igindugang pa ni Ambil nga pinaagi hini, aada an oportunidad para hin mga de-kalibre nga open swimming athletes an Borongan ngan plano han LGU nga magin host an syudad hin kompetisyon hini nga pa-ugnat ha kusog.
Kun manunumduman, hi City Mayor Jose Ivan Dayan Agda in nagpasabot nga usa han prayoridad han iya administrasyon an himoon an Borongan City nga sentro hin Sports Tourism.
An syudad in kada tuig mananagbalay han National Surfing Championship. Naghimo na gihapon an syudad hin Skating Area nga gin desenyo han bantuganan nga skater Margielyn Didal.
Plano gihapon han LGU nga magin host han gisasyahani nga National Archery Tournament nga bubuhaton ha baybayon ha Baybay Blvd hiton Agosto 2023. #
