Isumat.com/ Nobyembre 30, 2022
Matutuman na an maiha na nga ungara han mga Boronganon ngan mga Estehanon nga magkamay-ada na hin commercial flights operations an Borongan City Airport.
Ha maabot nga Disyembre 19, 2022, an Philippine Airlines in mabiyahe ha ruta nga Cebu-Tacloban-Cebu, Lunes ngan Biernes kada semana. Malupad ha Cebu tikadto ha Borongan an PR Flight 2651 alas 11 hit aga ngan maabot ha Borongan alas 12 hit udto, ngan mabalik liwat tikadto ha Cebu 12:30 ngan maabot ha Cebu ala 1:30 hit kulop.
Pag-abot ha Cebu, puede na an connecting flight para han maderetso ngadto ha Manila. Ginbabanabana nga an presyo han pamasahe kun tikang ha Borongan-Cebu ngan deretso Manila in haros parehas la han Tacloban-Manila.
Ini in dako an maiiban ha oras han pagbiyahe para han mga taga Borongan ngan Eastern Samar. Kay an natatabo yana, mabiyahe pinaagi hin behikulo tikang ha Borongan ngadto ha Tacloban hin upat ka oras ngan masakay han eroplano tikadto ha Manila.
Ini nga Cebu-Borongan-Cebu in dako an mahihibulig ha ekonomiya ngan turismo han Eastern Samar tungod han masayon nga transportasyon han mga produkto sugad man biyahe han mga turista.
Kakulop nga adlaw, Nobyembre 29, 2022, an mga opisyales han LGU-Borongan City ngan PAL in pormal nga nagpirma han Memorandum of Agreement para han mao nga flight operations.
Ha panig han LGU-Borongan amo hi Mayor Jose Ivan Dayan Agda ngan para han PAL amo hi Capt Stanley Ng, presidente ngan Chief Executive Officer han airline company.
An nasabi nga aktibidad in ginsaksihan nira Governor Ben Evardone, Eastern Samar Congresswoman Maria Fe Abunda, 4Ps Representative ngan House Minority Leader Nonoy Libanan, mga kaapi han Borongan Sanguniang Panglungsod ngan mga tinaglawas han PAL. #
