Isumat.com/ Disyembre 1, 2022

Naghihingaraykaday ngan waray dereksyon an New Peoples’s Army ha Sinirangan Bisayas tungod han kamatay hin hitaas nga lider han kumunista nga kagi-usan dida han engkwentro nga natabo ha Las Navas, Northern Samar pira pala ka adlaw an nakalabay.

Ha notisya han Philippine News Agency, hadton Nobyembre 23, 2022, naawat an kinabuhi ni Helenita Pardales alyas Ka Elai, an namumuno han Eastern Visayas Regional Party Committee han CPP-NPA. An aragway in natabo ha Brgy Imelda, Las Navas.

Hi Pardales in lakip han unom nga mga rebelde nga namatay dida hini nga operasyon han militar kun diin nabungkag han mga tropa han gobyerno in dako nga kampo han mga rebelde ngan nakarekupo hin 18 nga high-powered firearms.

Hi LtCol Joemar Buban, Commander han 20th Infantry Battalion, in nagsumat nga tungod han kamatay ni Parlade, bakante yana an liderato han NPA sanglit waray magtutugway han mga kumunista ngan manluluya an ira kaburut-on.

Labot la kan Parlade, duha nga mga lideres han NPA ha Northern Samar in namatay gihapon dida han nasabi nga engkwentro, pahayag pa han Philippine Army.

Dida han mao nga panhitabo, ginbayaan han mga rebelde nga nangiskapo an 18 nga armas ngan sumala han militar, klaro ini nga tigaman nga matiwogtowog na an ira pwersa ngan waray na kapas nga umato pa kontra han gobyerno.

Iginpahayag gihapon han Philippine Army nga dako ini nga kapi-angan ha NPA labi na gud nga magtitigaman han anibersayo an Communist Party of the Philippines hit Disyembre 26.

Ha Eastern Visayas, upat pa nga guerilla fronts han NPA an ginmamalabungkag han militar ngan ini nga mga hugpo in adto tanan ha Northern Samar. Ginbabanabana nga maabot hin 300 nga rebelde ngan supporters nga miembro hini nga guerilla fronts in nagtitinago ha kabubkiran, pahayag pa han militar.#