Isumat.com/Enero 10, 2023
Igindig-on ni PNP Regional Director BGen Rommel Francisco Marbil nga hiya ug an ngatanan nga 3rd Level Officers han ahensya in waray koneksyon ha iligal nga droga.
Yana nga adlaw, Enero 10, 2023, hi Marbil in nagdumara hin press conference ha Regional Office, ngan ha atubangan han mga taga media ngan mga opisyales han PNP, iya pinirmahan in usa nga affidavit kun diin nahipapatik nga deri hiya nadadabi han nasabi nga illegal drugs trade, deri hiya nakarawat hin salapi o benipisyo tikang han naghihimo hini nga kriminal nga aktibidad, deri hiya naprotektar hin bisan hin-o dida hini nga pagtaga droga, ngan deri niya ginkukunsinte ini nga mga ginawi-an.
Subay han PNP Records, waray gihapon 3rd level officers han PNP Region 8 an nalalambigit hini nga iligal nga aktibidad, pahayag pa han affidavit.
Kun aton manunumduman, hi DILG Secretary Benhur Abalos Jr in nanawagan ha mga heneral ngan koronel ha PNP nga magsubmiter hin courtesy resignation komo kaparte han pitad han gobyerno paglimpyo han ahensya han mga opisyal nga posible may sumpayan ha mga sindikato han illegal drugs.
Iginsumat ni Marbil nga hiya in nagsubmiter na han iya courtesy resignation upod an usa pa nga heneral ngan 19 nga Full Colonels nga nakadestino ha Regional Office.
Iya gin-aghat an mga Chief of Police ha rehiyon nga may ranggo nga koronel nga sumunod gihapon han panawagan ni Abalos.
Tobtob la ha Enero 31, 2023 an pagsalawad han courtesy resignation. Kataliwan hini, pag-aadman an mga records han 5-man Panel ngan ini in igpapasa ha National Police Commission para han Final Review. Katapos, igsusubmiter ha Malakanyang basi magdesisyon an Presidente kun kankanay courtesy resignation an iya kakarawaton.#
