Isumat.com/Enero 10, 2023
Naawat an kinabuhi hin 9-anyos nga babayehay han makuryente hiya kakulop, Enero 9, 2023 ha Brgy Borac, Naval, Biliran.
Ginkilala an biktima nga hi Janine San Andres, nag-uukoy han nasabi nga lugar.
Ha inisyal nga imbestigasyon, nagsumat an amay han biktima, Joseph San Andres, nga pasado alas 4 han kulop, iya natad-an nga nahuyang na an iya anak sapit hin usa nga poste hin koryente didto han nasabi nga lugar.
Ha inspeksyon han mga otoridad, ira nakit-an in usa nga rolled wire nga gingamit komo extension wire dida han poste ngan gintotoohan nga dida ini nakuryente an bata. Natabo ini samtang makusog an bunok han uran.
Gindara ha hospital an biktima pero igindeklarar han mga doktor nga dead on arrival.
Ha iba naman nga panhitabo, nagbitay han iya kalugaringon hinungdan han iya kamatay in usa nga lalaki ha Brgy San Antonio, Alangalang, Leyte, Enero 9, 2023.
An biktima in ginkilala nga hi Arnel Tonido, 32 anyos, waray asawa, ngan residente han nasabi nga barangay.
Nagpapakita an imbestigasyon nga alas 4:30 han kulop han madiskubre han iya lolo nga hi Emiliano Baldonado nga nabitay na an lawas han biktima ha ira balay. Gintalinguha nira nga madara ha Rural Health Unit hi Tonido pero dead on arrival na hiya.
Ha spot report han PNP, iginmamalatumat nga kumbinsido an pamilya han biktima nga nagpakamatay an ira paryente ngan posible depresyon an motibo. #
