Mahuman in unom ka tuig nga pag tinago nag surrender ngan Nag piyansa hin 150,000 pesos para han iya temporaryo nga kagawasan hi anay Carigara Leyte Mayor ngan Leyte provincial board member Anlie Apostol kasumpay han iya kaso nga murder. Ini in mahuman nga ma “downgrade” an iya kaso nga “murder by inducement” o pag sugo hin pag patay ngadto han kaso nga “murder by accessory”

Mahinunumduman nga hadton 2016 gin pasakahan hin kaso nga pag sugo hin pag patay kan Dennis Mesias hadton September 12, 2012 subay han pag asoy ni Alexander Tremendal an body guard ni Apostol nga nag sumat nga hiya an pumatay kan Dennis Mesias ngan iya gin tudlok hi Apostol nga amo an nag plano ngan nag sugo haiya upod an mag bugto nga Vilma ngan Alfredo Obaob.

Pero gin pan himuwa ni Apostol ngan han iba pa niya nga mga akusado nga hiya in may kalabutan ha pag patay kan Mesias.

Gin palusad an warrant of arrest kan apostol ngan han iba pa nga mga akusado hadton mayo 2016 tulo ka adlaw san-o an local election nga kon diin kandidato hiya pagka mayor han bungto han carigara leyte kontra kan incumbent Mayor Boy Ong.

An biktima amo an gin tatahapan nga nag kikinawat hin gasolina han gasolinahan nga gin tatag iyahan ni Apostol hinungdan nga hiya in gin pa patay sumala han alegasyon ni Tremendal. Hi Tremendal in napa matud-an han korte nga amo an pumatay kan Mesias ngan yana ini in aadto na ha prisohan samtang An duha pa nga mga akusado an mag bugto ngan Vilma ngan Alfredo Obaob in waray pa ka dadakpi han mga otoridad.

Sumala kan Atty. Leo Giron an abogado ni Apostol nga dida han gin dumara nga utro nga pag imbestiga han Department of justice han mao nga kaso na sabutan nga waray supisiyente nga basehan para kasohan hin pag sugo hin pag patay hi Apostol kundi kumo usa la nga “accessory” han mao nga kremin hinungdan han pag bag-o han kaso kontra haiya.

Sumala pan kan Atty. Giron nga personal nga nag surrender an akusado ha Station 2 han Tacloban city police office Hunyo 15, 2021 para han pormal nga pag proseso han iya pag surrender sugad han pagkuha han mug shot ngan fingerprints samtang nga sul-ot an panapton han kanan detenido nga akusado hin kremin.

An kaso ngan pag sugo hin pag papatay in waray piyansa samtang nga an akusasyon hin pagigin kaparte hin kaso nga pag patay in mau piyansa ngan mas haruhabubo iton kaprisohan sumala kan Atty. Giron hinungdan han pag surrender ni Apostol.

Ha pamakiana han isumat.com kan Atty. Giron kon mayda ba posibilidad nga an mao nga kaso in may kalabutan hin politika hiya in nag sering nga waray niya direkta nga ebidnesiya nga mag papamatuod hini kundi an iya la na obserbahan nga an mga abogado nga nag representar han mga tag reklamo han mao nga kaso amo hira Atty. Lorna Kapunan han Kapunan and Castillo Law firm nga sumala pa haiya na tag 100,000 iton pinaka minos nga acceptance fee hiton ira kinakaptan nga mga kaso nga deri ordinayo la nga mga tawo iton makakaakos hini.

Yana kay boluntaryo naman nga nag surrender ngan nakag piyansa hi Apostol mayda na niya higayon nga atubangon iton iya kaso agud iya mapa matu-an nga waray hiya kalabutan han akusasyon kontra haiya sumala pa kan Atty.Giron.