Isumat.com/4:03AM, October 9, 2020
Nagpapadayon an waray hugpoy nga insidente hin panmatay ha Calbayog City.
Kakulop, Uktobre 8, hi anay City Counsilor Jessie Jackson ug an iya upod nga babaye ginkilala nga hi Erika Ygrubay in naawat an kinabuhi han panmusilon samtang sakay hin motorsiklo ha National Highway, Tinambacan District han nasabi nga syudad.
An sobra 40-anyos nga hi Jackson an nagmamaneho han motorsiklo ngan angkas niya an 20-anyos ngahi Ygrubay han tigda la paarakan hira hin bala hin waray pa panhikilal-i nga suspetsado banda alas 2 han kulop. An mga biktima in namatay dida mismo han lugar han insidente.
Hi Jackson in nagin kagawad anay han Brgy Bantian hadton 2010 ngan nagin konsehal han syudad han 2016. Kumandidato hiya utro han 2019 Elections pero waray na magdaog. Kaapi hiya han partido o ticket ni incumbent Mayor Ronald Aquino han pagkandidato dida han 2019.
Subay han impormasyon nga nahikay han Isumat.com, an pamilya ni Jackson in aada ha negosyo han isdaan (fish dealer).
An mga otoridad in nagdudumara yana han imbestigasyon basi matudlok an pangilal-an han mga suspetsado ug an motibo han krimen.
Duha pala ka semana an nakalabay, usa nga empleyado han City Hall ug an iya umangkon an namatay han panmusilon didto gihapon han syudad. Antis hini, usa nga lalaki an pinusil ngan namatay harani la han lugar hini nga panhitabo.
Maiha na nga katuigan nga pirmi may notisya hin panmatay didto han nasabi nga syudad ug gintutudlok nga pulitika, away hin propyedad ngan paghidabi ha iligal nga droga an posible nga mga motibo han magkalainlain nga insidente. #
