Isumat.com/7:23AM, October 9, 2020

Tinikangan yana nga adlaw Oktubre 9 tobtob Oktubre 23, 2020 igpapasunod an Hard Lockdown ha 16 nga mga barangay ha Calbayog City.

Nagdesisyon an Inter-Agency Task Force han syudad nga igpailarum ha Lockdown an nasabi nga mga barangay basi kabalabgan na an paglobo han mga ihap han mga nagkakatapnan han Covid-19. Subay han gibabag-uhi nga report han DOH Regional Office, aada na ha 337 nga Calbayognon an nagpositibo han kagaw.

Han nag-agi nga pira ka adlaw, porlomenos 100 katawo didto han nasabi nga syudad an nadarahigan han virus ngan igindeklarar na han DOH nga natatabo na an Community Transmission ha mao nga mga barangay.

Hapagkayana, sobra 200 an Active Cases ngan duha na an namatay nga Covid Patients ha Calbayog. Maabot naman hin 100 an nagpaka-recover na.

An mapapayungan han Hard Lockdown amo an masunod nga mga Barangay: Aguti-itan, Bagacay, Balud, Capoocan, Carmen, Central, Dagum, East Awang, Hamorawon, Matobato, Nijaga, Obrero, Payahan, Rawis, San Policarpo ngan West Awang.

Iginpatapod naman ni City Mayor Ronald Aquino nga maghahatag hin ayuda an LGU ha mga pamilya han nasabi nga mga barangay. Panguna nga ayuda an tag lima ka kilo nga bugas ngan duha ka bug-os nga manok ha kada pamilya.

Samtang, iginreport gihapon han DOH nga 51 na nga pasyente han Covid ha Rehiyon Otso an naawat an kinabuhi.

Kakulop, may nahidugang nga 84 nga natapnan, sanglit umabot na ha 5,195 an Total Cases han rehiyon. An nagpaka-recover in aada na 4458 (85%), ngan mayda 687 nga Active Cases hapagkayana.

Tigda naman an pagdamo han natapnan ha Maasin City, Southern Leyte kay 19 an nahidugang nga nagpositibo kakulop. Ini in pinaagi han Local Transmission sumala han DOH. Hinungdan hini, 67 na an nagkatatapnan nga Maasinhon.

Kasumpay hini, hi Maasin Mayor Nacional Mercado in hingpit nga nanawagan ha iya mga nasasakupan nga magin mabinantayanon ngan tim-os pagsundon an mga patakaran basi makalikay han virus. #