Isumat.com/Mayo 5, 2023
Pagpasundayag han “Bulawanon nga Katbari ha Sinirangan” an nagin dalan basi madag-an han pambato han Eastern Samar, Airissh Ramos, an Best in National Costume han 2023 Miss Universe-Philippines.
An pagpili han nasabi nga award in gindumara kagab-i, Mayo 4, 2023 ha HRDC Alba Hall han Leyte Normal University, Tacloban City.
An desenyo han costume ni Ramos in nagpapakita han pagdukwag han agrikultura ha Sinirangan Samar ug an kamaribhong ngan kamabaysay han 23 nga bungto han probinsya.
Iginpapadayag gihapon han disenyo an kinasingkasing nga pagsaludo ha mga mag-uuma nga duro an paningkamot nga magkaada hin produktibo nga ani sugad man pagpasalamat ha Makagarahum han grasya ha kaumhan.
An costume ni Ramos an ginhimo ni John Hubert Capito, an ma-inugupon ngan talentado nga designer nga taga Oras, Eastern Samar. Hi Airissh in taga Arteche, E. Samar nga harani la nga bungto han Oras.
Dida han mao nga kompetisyon, hi Ramos in nakakuha hin marka nga 95.2% ha pagderde niya han 37 pa nga iba nga kandidata.
Nakuha naman ni Miss Benguet Joemy Leo an 2nd place (93.9) samtang hi Miss Southern Leyte Kimberly Descartin an 3rd placer (93.3).
Labot la han Best in National Costume, hi Ramos in usa han tulo nga kandidata nga napili nga Miss Tingog Pilipina Awardees. Hi Airissh amo an Tingog Pilipina-Visayas, samtang hi Miss Baguio Krishna Gravidez an Tingog Pilipina-Luzon, ngan Miss Agusan del Norte Janarie Zarzoso an Tingog Pilipinas-Mindanao.
Ini nga Tingog Pilipina Awards an iginhatag han Tingog Partylist.
An Coronation Night han Miss Universe-PH 2023 in bubuhaton ha Mall of Asia Arena hiton Mayo 13.
Dida han pag-abot han mga kandidata nganhi ha Eastern Visayas hadton Mayo 1, 2023 hi Ramos in tim-os nga nagpasalamat han iya igkasi mga Waraynon han mapaso nga pagkarawat han ira grupo.
Namasyada an mga contestants ha magkalainlain nga mga tourist spots ha Leyte ngan Samar antis an kompetisyon han National Costume.
Antis pa han iya pag-api han Miss U-PH, hi Ramos in nagin 1st Runner-up han Miss Pintados.#
