Isumat.com

An pag-upod han magtala-iroy nga hira Henerosa ngan Jessica Durana kakulop han kulop, Mayo 3, 2023 amo na ngay-an an katapusan nga higayon nga magkaka-usa hira.

Ini in tungod kay binawi-an hin kinabuhi an 30-anyos nga hi Jessica han mag-antos hin mga igo hin bala ha panmusil hin waray hikilal-i nga suspetsado pasado alas 5 han kulop, ha pathway han Brgy 43, Quarry District, Tacloban City.

Ha inisyal nga imbestigasyon han Tacloban PNP, an biktima nga waray asawa ngan empleyado hin pribado nga kompaniya in nagbabaktas tikadto han ira panimalay ha Brgy 42 upod an iya iroy nga hi Henerosa han tigda la nga pira ka beses pusilon an biktima.

Tungod han gulpi nga mga igo han bala, hi Jessica an naawat an kinabuhi.

Ha interview han iFM-RMN kan Tacloban PNP Station 2 Chief Major Joselito Amistoso, ginkilala an suspetsado nga hi Master Sgt Van Gregory Benitez, 44 anyos, bulag ha asawa, miembro han Tacloban PNP ngan yana nagpapilarum hin “schooling”

Nagpahayag an nanay han biktima nga samtang nagbabaktas hira han iya anak, ginkompronta ni Benitez hi Jessica ngan nagkaada hin halipot nga argumento ngan nagsering an suspetsado nga “Sorry, Jessica” ngan ginpusil na an biktima.

Tulo nga igo hin bala ha dughan ngan usa ha butkon an gin-antos han biktima nga iya ikinamatay.

Positibo nga ginkilala ni nanay Henerosa an suspetsado tungod kay mayda relasyon han iya anak ngadto han suspek. Ha mga mensahe ha cellphone han magka-relasyon, nagawas nga may mga takna nga nag-aaway hira.

Samtang ginsusurat ini nga notisya, padayon nga nananawagan an Tacloban PNP nga sumurender na hi Benitez. Kagab-i, nagpadangat hin “feelers” an suspek nga masurender na, pero tobtob han alas 9 han aga, Mayo 4, 2023, waray pa magtubyan han iya kalugaringon an suspetsado.#