Isumat.com/Agosto 7, 2023
Nagin trahedya an dinangatan hin usa nga lalakihay nga nanguha la unta hin bayabas pero binawi-an hin kinabuhi han tukbon hin halas kakulop, Agosto 6, 2023, ha Brgy San Juan, Sogod, Southern Leyte.
Ha report nga nahikay han IsumatNews, ginkilala an biktima nga hi Jhonson Cuyno, 12 anyos an pangedaron ngan residente han nasabi nga lugar.
Han aga hadto nga adlaw, hi Jhonson ug an iya bugto nga hi Jhonloyd in nanguha hin bayabas ha lugar nga harani la han ira balay. Han tipa-uli na hira banda alas 11 an takna, natabo an insidente.
Ha pagsaysay han magurang nga bugto han biktima ngahi Mariefe, nakakita an magbugto hin nagkikiwa ha pundok hin si-ot ngan kasering nira nga may tamsi dida han si-ot.
Ginpanginano ni Jhonson an ilarum han si-ot pero yatot an iya nakit-an. Kumarida an yatot ngan lalanaton unta han biktima an yatot, pero gintukob hiya hin halas ha wala nga parte han iya hita.
Naka-uli an magbugto ngan nagsumat hi Johnloyd kan Marife nga kinagat hin halas hi Jhonson. Ginlimpyuhan ni Jhonson hin tubig ngan sabon an kasamdan ngan nag-aaraba na an biktima nga nagtitikakuri an iya pag ginhawa.
Kadagmitan nga sumakay hira hin motorsiklo tikadto ha Sogod District Hospital ug samtang nagbibiyahe hira, gin-agda pa han biktima an drayber han motorsiklo nga paspasan an pagpadalagan kay karuyag pa niya mabuhi.
Ginta-uran dayon hin dextrose hi Jhonson pag-abot ha hospital, pero ginsagdunan hira han doktor nga kinahanglan madara dayon ha Tacloban an biktima kay waray suplay hin anti-venom an hospital.
Dida han nagbibiyahe na hira tipakadto ha Tacloban, binawi-an hin kinabuhi an lalakihay.
Kasumpay hini, nanginginyupo hi Mariefe ha mga otoridad ha panlawas nga magkaada unta hin anti-venom ha mga hospital basi kalikyan an sugad hini nga mga insidente.
Nagpahayag pa hi Mariefe nga an itom an kolor han halas ngan may yellow color ha parte han tiyan ngan didto ha ira tinatawag ini nga “hagwason.” (via Cebu Daily News)
