Isumat.com/Hulyo 5, 2023
Bisan gud ano nga butang basta magpanunubra, deri gud maupay an dadangatan, labi na kun nagpanunubra an paglinag-ukon hin makahurubog nga irimnon.
Amo ini an natabo ngadto hin usa nga Canadian nga nag-uukoy ha Biliran, ngan usa nga Lending collector ha Southern Leyte. Binawi-an hin kinabuhi an langyawanon, samtang nagdaros ngan nagpabuto hin pusil an kolektor hin pa-utang.
Ha report han Biliran PNP, namatay an Canadian nga hi William Ronald Haynes ha ligid han pantalan ha Naval hadton maagahon han Hulyo 3, 2023. An biktima in 69 anyos, may kalungon nga Pilipina, ngan nag-uukoy ha Benjamin Hotel, Naval, Biliran.
Hadton gab-i han Hulyo 2, hi Haynes ug an iya kalungon nga hi Elma Siat in nagkaada hin mapaso nga argumento ha sulod han kwarto ha hotel nga ira inuukyan. Nagsumat hi Siat nga an paghinubog ni Haynes an rason han ira pagbalingkutay kay bisan ano pa nga iya hangyo, deri gud nahunong pag-ininom hin makahurubog nga irimnon an canadian.
Pasado alas 8 hadto nga gab-i, lumakat hi Haynes ngan pumakadto ha dapit han pantalan may bitbit nga botelya han irimnon. Didto nagliningkuron hi Haynes samtang segi an pag-ininom.
Pasado alas 5 han aga kinabuwasan, may nakakita nga nahigda na an Canadian, ginpukaw hiya pero waray pagmamata ngan deri na nagi-os, sanglit nangaro hin bulig an mga opisyales han barangay ha kapulisan sugad man ha Rural Health Unit.
Ginkumpirmar han doktor nga patay na hi Haynes ug an rason amo an Cerebrovascular Accident o Stroke.
Samtang, didto naman ha Malitbog, Southern Leyte, nahipaslak ha karsel ngan maatubang hin mga kaso an suspetsado nga hi alyas Del han magpabuto hin pusil nga nagdurot hin kabaraka ha mga mulopyo.
Ha imbestigasyon han kapulisan, alas 4 han kulop, Hulyo 3, nakakarawat hira hin report nga an suspetsado in nagpabuto hin pusil ha Brgy Juangon. Hinsabutan nga hubog an 33 anyos nga suspetsado nga nagtatrabaho komo kolektor hin lending company.
Nakumpiskar tikang kan Del an Colt 45 Caliber pistol, upat nga bala ngan tulo nga basiyo hin bala ha lugar han insidente.
An suspek in waray makagpresentar han kaangayan nga mga papeles kun kay-ano mayda niya dara nga pusil. #
