Isumat.com/Hunyo 7, 2023
Hustisya an igin-aarungot han pamilya han mga biktima sugad man mga residente kasumpay han pagkamatay han duha nga construction workers nga nabuthan han bomba nga igintanom ha kalsada han mga kaapi han NPA ha Las Navas, N. Samar.
Kun manunumduman, hira Jerson Cabe ngan Rowel Lebico in nagka-aawat an kinabuhi han bumuto an landmine ha kalsada nga ginsusulsog han ira motorsiklo hadton Hunyo 3 ha Brgy Magsaysay, Las Navas.
An misis ni Cabe nga hi Jen in mabidoon nga nanginyupo ha mga rebelde nga humunong na han brutal nga panmatay nga nakaka-alakbat han kinabuhi han inosente nga mga sibilyan.
Sering pa ni Jen, duro hin kamakuri yana an ira kabutangan kay nawarayawan hiya hin asawa ngan nawarayan amay an duha nira nga anak nga nag-eedad pala hin 4 anyos ngan waray pa ngani mag usa ka tuig an ikaduha nga anak.
Kadungan hini, hi Magsaysay Barangay Captain Daisy Durin in mahugot nga nagkondenar han bayolente nga mga binuhatan han rebelde nga mga kumunista. Sering pa han kapitana, nakakaperwisyo ngan nakakasamok ha ira pagpakabuhi ini nga mga gi-os han NPA.
Naghangyo hi Durin ha walhon nga grupo nga deri na utruhon ini nga ira pangatake kay kamurayawan an hingyap han mga baryuhanon.
Han nakalabay nga katu-igan, kadam-an nga sugad hini nga terorista nga insidente an nahipatik ha Northern Samar. Lakip denhi an kamatay han 9-anyos nga hi Armando Remolde nga nabiktima han bomba nga iginlabay han mga rebelde ngadto han mga sundalo hadton April 2019 ha Brgy San Miguel, Las navas.
Namatay gihapon in duha nga kaapi han PNP ngan upat pa nga iba an nasamad hadton Hulyo 2022; ngan iba pa nga nabiktima han mga improvised explosive device.
Mahugot nga igindederi han balaud ha bug-os nga kalibutan an paggamit hin landmine ha mga engkwentro kay nakakadarahig ini ha mga sibilyan.
Magbabaton liwat ha balaud an hin-o man nga grupo nga maglalansad hin pangatake bisan kun nasabot hira nga may madadabi nga mga sibilyan. #
