Isumat.com/Enero 11, 2023
Nadugangan na liwat an ihap han mga naawat an kinabuhi ha Sinirangan Bisayas tungod han waray hunong nga magkusog nga uran nga iginpusdak tikang han syahan nga semana han 2023 tobtob yana.
Dida han magkalainlain nga mga reports nga nahikay han IsumatNews, tulo ka tawo an nagkamamatay ha mga insidente hin kalumos ngan atake ha kasingkasing tungod han kahadlok han maraot nga panahon.
Ha report han Kasugbong han Estehanon, usa nga PWD ha Brgy San Pascual, Dolores, E. Samar an namatay tungod han atake ha kasingkasing. An biktima in duro an kahadlok tungod han hitaas na nga baha ha ira lugar hadton kulop han Enero 10, 2023.
Tungod han iya kabaraka, nag-antos hin heart attack an biktima rason han iya kamatay.
Didto naman ha Mahaplag, Leyte, iginreport han mga otoridad han mao nga bungto an insidente hin kalumos kun diin ginkilala an biktima nga hi Dioscoro Pauyon, 53 anyos, waray asawa ngan residente han Brgy Mahayahay.
Hadton aga han Enero 10, 2023, natad-an han mga paryente han biktima an iya patay nga lawas ha parte han umhanan nga hilarom an tubig-baha. Iginsumat han mga paryente nga iginbabalhin la unta ni Pauyon an ira kabayo ngadto hin talwas nga lugar han malumos an biktima.
Samtang, gintotoohan nga kalumos gihapon an hinungdan han kamatay han 74-anyos nga hi Lolita Mendoza han Brgy Can-andan, Isabel, Leyte.
Hadton Enero 4, gin-iliw na hiya han iya mga kaupod ha balay ngan kakulop, Enero 10, 2023, alas 8 han aga, natad-an ha ligid han salog ha mao nga barangay nga nalutaw an patay nga lawas. Kadagmitan nga iginlubong an biktima tungod kay nadudunot na an patay nga lawas.
Ha luyo nga bahin, nawawara an mag-asawa nga hira Carlito ngan Winefreda Dagumay han matiklob an ira sinasakyan nga baloto ha Suribao River, Brgy Pinanag-an, Borongan City, E. Samar.
Ginbabanabana nga natabo ini pasado alas 4 han kulop, Enero 9, 2023 samtang nagpapadayon an makusog nga uran.
Tobtob han ginsusurat ini nga notisya, waray pa nakuha nga update an Borongan PNP kun ano na an dinangatan han mag-asawa.
Iginpahayag pa han tobtob yana, delikado la gihapon an pagbiyahe didto han nasabi nga salog.#
