Isumat.com/Agosto 30, 2022
Waray hunong nga umento han presyo han papliton, diesel, gasolina ngan iba pa nga produkto…adi na liwat hin bag-o nga kalbaryo nga madagmal ha mga Pilipino – magkakaada hin paghitaas an pamasahe han pampasahero nga jeepney sunod nga bulan.
Deri na kapupudngan an pag-umento han pamasahe ha jeepney ngan ini in matatabo dida hit Setyembre, ini an iginpahayag ni Cheloy Garafil, Chairperson han Land Transportation Franchising and Regulatory Board (LTFRB) kakulop, Agosto 29, 2022.
Nagsering hi Garafil nga magkaka-ada hin hearing an LTFRB han petisyon han mga grupo hin jeepney drivers ngan operators nga umentuhan hin 3 ngadto ha 4 pesos an minimum fare. Ginbabanabana han LTFRB nga dako an posibilidad nga aprubaran nira an petisyon pero paghihisgutan pa an kantidad.
Ini nga umento han pasahe ha jeep in kinahanglan na gud, sering ni Garafil, kay an katapusan nga pag-umento hadto pa han tag 44-pesos pala an presyo han diesel, pero yana doble na an presyo han diesel. Ginklaro pa han opisyal nga an igin-implementar hadin Hulyo amo an 2 pesos nga Provisional Increase .
Nagpatapod naman hi Garafil nga antis hira magdesisyon, maaro hira hin kasalagdunan tikang ha National Economic Development Authority (NEDA) basi magin rasonable ngan patas para han ngatanan an kantidad han umento.
Labot la han jeepney, mayda gihapon nakabitay nga mga petisyon para hin fare increase an mga grupo han taxi, bus ngan UV Express.#
