Isumat.com/Agosto 30, 2022
An Tacloban City Airport in lakip han tulo nga mga aeropuerto han nasud nga makaka-agom hin dako nga kantidad para han pag-upgrade o pagpaka-upay han mga facilidadis sunod nga tuig.
Dida han pahayag han Appropriations Committee han kongreso, an Department of Transportation in mag-aalutaga hin 2.5 Bilyon pesos para han pag-ayad hin tulo nga airports basi maka-akomodar hin kadugangan nga mga eroplano ngan pasahero.
Dida han nasabi nga kantidad, an Tacloban Airport in magagahinan hin 1.42 Bilyones. Ini nga airport amo an gintudlok han Civil Aviation Authority of the Philippines komo Principal Class 1 Domestic Airport.
Labot la han Tacloban Airport, makakatagamtam gihapon hin 500 Milyones an Evelio Javier Airport ha Antique, ngan 445 Milyones para han Laoag International Airport ha Ilocos.
Iginpatapod han komitiba ha kongreso nga ini nga pondo in ma-uupod han 2023 National Budget. Ini nga kantidad in aada ha ilarum han Aviation Infrastructure Program han Dept of Transporation.
Iginpahayag ni Appropriations Committee Vice Chairman, Congressman Luis Campos, an sugad hini nga pondo in gingagamit para han upgrading han runways, taxiways, aprons, air traffic control buildings, passenger terminals, refuelling facilities, fire stations, powerhouses, water and sewage systems.
Kinahanglan pag-upayon pa an mga airports kay dako hin duro an kontribusyon hini ha ekonomiya han nasud tungod han damo nga biyahedor parehas han turista, negosyante ngan mga produkto. Ini in labot la nga kinahanglan gihapon an airports ha panahon han kalamidad, pahayag pa ni Campos.#
