Isumat.com/7:46AM, Enero 27, 2021
Ginpaningkamutan han Bureau of Jail Management and Penology (BJMP) nga mas magin komportable an kahimtang han mga preso ha District Jail ha Naval, Biliran.
Ini in tungod kay hiton Marso igbabalhin na an mga preso o Persons Deprived of Liberty (PDL) ngadto han bag-o nga facilidad. Hito nga bulan nakatalaan an inagurasyon han nasabi nga building ug titikangan na gihapon an operasyon han facilidad.
Dida han report han Philippine Information Agency-Naval, nagmamalatumat nga an facilidad in nagkakantidad hin 8.9 Milyones Pesos. Ini nga istraktura in duha ka andana ngan may roof deck kun diin puede makagpasirak ngan makagpahangin an mga bilanggo.
Iginpatapod gihapon han BJMP-Naval nga mahugot an seguridad tungod kay kada selda in may kalugaringon nga control gate, labot la han main cell gate.
Sumala kan SJO4 Felix Eduardo Carcellar, Jail Warden ngan OIC Provincial Administrator, makaka-akomodar hin 260 nga mga preso an facilidad nga amo an standard nga ginpapasunod han ahensya. An building in mayda walo nga haluag nga kwarto nga makaka-sakto hin 36 nga PDL an kada kwarto.
Iginpahayag pa ni Carcellar nga plano gihapon han BJMP nga butangan hin extension ini nga building basi himoon nga training center han mga PDL.
Hapagkayana, nanlilimbasog an BJMP-Naval nga makakuha na han Certificate of Occupancy basi mahigamitan na an facilidad han mga preso antis pa pagdumaraon an inagurasyon. #
