Isumat.com/1:12PM, Enero 26, 2021
Mayda na liwat batan-on nga nagtiwas han iya kinabuhi ug an gintutudlok nga hinungdan amo an pagbusa han iya lola .
Sumala han report han Palo, Leyte PNP, an 15-anyos nga estudyante in naghikog pinaagi han paghigot hin nylon ha iya liog ngadto han kisame han ira balay ha Brgy Castilla hadin nag-agi nga adlaw.
Ginbinusaan daw han iya lola an teen-ager tungod han kamalakat. Nagkaada hin mapaso nga balingkutay an duha ngan umabot ha takna nga nagtarhog an estudyante nga magpapakamatay hiya.
Paghagos hin pira ka oras, natad-an nala han tatay an biktima nga nabitay na an lawas.
Hadin nakalabay nga semana, mayda gihapon ulitawohay ha San Antonio Basey, Samar an naghikog ngan sinundan liwat ini hin daragita nga nag-suicide ha Tolosa, Leyte. Nalutaw ha imbestigasyon nga pagbusa han ginikanan an hinungdan hini nga mga insidente.
Samtang, usa naman nga lalaki an pinusil ngan namatay ha Brgy San Victor, Tanauan Leyte kakulop, Enero 25.
An biktima in ginkilala nga hi Tirso Solvera, 50 anyos, may ka live-in partner. Waray naman panhikilal-i an duha nga suspetsado nga sakay hin motorsiklo.
Nagsumat an Tanauan PNP, alas 6:50 han gab-i, hi Solvera in natukdaw ha ligid han kalsada han umabot an mag-angkas han motor nga mga suspetsado. Nagkaada pa hin argumento an biktima ug an usa nga sakay han motor tobtob nga nagdulong hira.
Igindugang pa han report nga pinusil han suspetsado hin pira ka beses an biktima nga nag-antos hin mga igo ha magkalain lain nga parte han iya lawas.
Gindara ha hospital hi Solvero pero gindeklarar nga dead on arrival, samtang umiskapo naman an mga suspetsado.
Kakulop han aga, hi Konsehal Samuel Lagario han Pinabacdao, Samar in gin-ambush ngan namatay ha Brgy Laygayon didto han nasabi nga bungto.
Han una nga semana, ha sulod la hin 24-oras, duha nga kalalakin-an an pinanmusil ngan nagkamamatay ha Calbayog City ha magkalain nga panhitabo. #
