“Nag lilipay iton siyudad han Tacloban han mga benipisyo han proyekto pag palaga han mga suga nga gin butang ha San Juanico” Bridge. ( Tacloban City is really Enjoying the perks of having the san juanico lighted ) ini an pamahayag ni Samar Governor Sharee Ann Tan ha usa nga Press Conference nga gin dumara ha siyudad han Calbayog.
Samtang nga nag lilipay an siyudad han Tacloban, an pakiana hino man an ma gastos han pag mintinar han mao nga proyekto sugad han pag bayad han kuryente ngan an mga tawo nga mag dudumara han “lights and sounds” nga pasalida han mao nga tulay ngan iba pa nga mga ka garastusan?
Sumala kan Governor Tan nga an probinsiya han Samar in mag aalotaga hin singko milyones kada tuig para garastuson han pag mintinar han San Juanico Bridge ha panuyo nga ini in makabulig han pag pa kusog han turismo ngan maka bulig han economiya deri la han probinsiya han Samar kundi ha bug-os nga rehiyon otso.
Dida han nag labay nga adlaw han miyerkules October 19, 2022 pormal nga gin palaga an mga suga han San Juanico Bridge ipinaagi hin usa nga seremonya nga gin atinderan mismo ni Presidente Ferdinand “Bongbong” Marcos Jr.
Gumastos hin milyones an gobyerno ipinaagi han Department of Tourism (DOT) ngan Tourism Infrastructure and Enterprise Zone Authority (TIEZA) pag butang han mga aesthetic lightings han San Juanico Bridge ipinaagi han pan limbasug han provincial government of Samar kaparte han programa nga “Spark Samar” nga an panuyo iparayaw ngan pa kurukusgon an turismo han probinsiya.
An Tacloban in mas harani han San Juanico Bridge kontra han Catbalogan ngan pira nga mga bungto han Samar hinugdan nga dako an benipisyo han mao nga proyekto ha mga hotel, Restaurant ngan iba pa nga mga establisimento tungod han gin lalauman nga mga turista nga ma pasyada han mao nga tulay.
