(File photo by Rappler)

Isumat.com/8:19AM, Pebrero 15, 2021

Imbes nga nagkaada na hin oportunidad nga deri mapreso ngan makabalik ha mamurayaw nga kinabuhi, sugad-sugad nga dayuday na an paghipaslak ha karsel hin duha nga suspetsado tungod han utro nga kalambigit ha iligal nga droga.

Hadton Marso 2020, hi Ramy Coritana in nakagawas ha presuhan katapos niya maka-agom han Plea Bargaining tungod han iya ka-aresto ha pagbaligya hin droga. Pero waray pa ngani mag-usa ka tuig tikang hadto, utro hiya nadakop ha parehas nga kaso.

Sumala han report han Tacloban PNP, an mga elemento han City Drug Enforcement Unit in nagdumara hin buy-bust operation pasado alas 8 han gab-i, Pebrero 14, 2021 ha New Hope Village, Sta Elena, Tacloban City. Dida han operasyon, arestado hi Coritana kun diin nakumpiskar ha iya in pito ka sachet hin gin-alegar nga shabu balor hin 30, 500 pesos.

Samtang, didto naman ha Burauen, Leyte, nadakop utro an suspetsado nga hi Sharon Estrella, 40 anyos, residente han Brgy San Esteban. Gintutudlok hi Estrella nga High-Value Target “Reloaded” han PDEA Eastern Visayas ngan Burauen PNP.

Nakumpiskar tikang han suspetsado in 12 ka sachet hin gintotoohan shabu ngan iginpaslak ha karsel didto han bungto.

An duha nga suspetsado in nakatalaan umatubang han kaangayan nga mga kaso nga igsasalawad kontra ha ira. #