Isumat.com/9:21AM, Pebrero 16, 2021
Ano man sangkay, makakasering ka ba hini nga “Sana All?”
Didto ha Eastern Samar, an ngatanan nga nagpositibo han Covid-19 sugad man an pamilya han namatay tungod han nasabi nga virus in nakatalaan maka-agom hin ayuda panalapi tikang ha gobyerno han probinsya.
Hi Governor Ben Evardone in nagpasabot nga an Provincial Government pinaagi han pondo tikang ha Provincial Social Welfare and Development Office, an mag-aalutaga hini nga cash assistance. An nagpositibo han Covid in makakakarawat hin 5 Mil Pesos, samtang makakatagamtam naman hin 10 Mil pesos an pamilya han tumalikod ha kadayunan nga natapnan han kagaw.
Sumala pa han impormasyon, mayda inisyal nga pondo balor hin 6 Milyones pesos an iggagahin para hini nga panuyuanan. Ini in agud makabulig ngadto han mga pamilya han nagkatatapnan ug an ginbayaan han namatay nga Covid patient.
Hapagkayana, gintikangan na han ahensya an panlista han natutungdan nga mga benefeciario hini nga cash assistance.
Samtang, mayda naman insentibo an mga lugar ha lalawigan han Biliran nga damo an magpapabakuna han Covid Vaccine, subay han plano ni Governor Roger Espina.
Dida han miting han Provincial IATF, iginpasamwak ni Espina nga an mga barangay nga damo an mapaturok in tatagan hin 100 Mil pesos, samtang an municipalidad nga damo gihapon an magpapa-injection in mayda 1 Milyon pesos.
Ini in agud ma-aghat ngan deri na magduraduha an katawhan pagpabakuna, labi na nga nag-alotaga na an probinsya hin salapi para han pagpalit han bakuna. #
