(Image courtesy)

Isumat.com/Agosto 5, 2022

Problema ha paghigugma an gintutudlok nga hinungdan han magkalain nga insidente hin pagpakamatay hin duha nga lalaki ha Ormoc City ngan Kananga, Leyte hadin nag-agi nga duha ka adlaw.

Dida han report han Kananga PNP Station, ginkilala an biktima nga hi Ferdinand Horca, 29 anyos, ngan residente han Brgy Masarayao han mao nga bungto.

Ha inisyal nga imbestigasyon, alas 12 han udto, Hulyo 4, 2022, an paryente han biktima in pumakadto han kapulisan para igsumat an panhitabo. Kadagmitan pumakadto han lugar han insidente an mga otoridad ug ira nakit-an an biktima nga nabitay an lawas gamit an pisi nga iginhigot ha iya liog ngadto han kisame ha balay han iya amay.

Gintalinguha nga madara ha hospital an biktima pero igindeklarar han doktor nga hiya in dead on arrival.

Hinsabutan nga dida han nag-agi nga mga semana, an biktima in nag-asoy ngadto han iya sangkay nga dako an iya problema tungod kay an iya kalungon in mayda iba nga lalaki. Nakakita daw an biktima hin mga litrato han iya kalungon nga may upod nga iba nga lalaki ngan nangangahigda ha katre.

Ha luyo nga bahin, hadton Agosto 3, 2022 iginreport an pag suicide ni alyas “Charl” ha Ormoc City.

An biktima in 19 anyos ngan nag-uukoy ha Brgy Can-Untog, Ormoc.

Hi Charl in gin-aalegar nga naghikog ha sulod mismo han ira panimalay.

An iroy han biktima in nagsaysay nga may ginpapas-an nga problema ha “lovelife” an iya anak antis an panhitabo.

An mga imbestigador in nagpahayag nga waray hira nakita nga foul play dida han duha nga insidente. #