Isumat.com/Agosto 5, 2022
Problema ha paghigugma an gintutudlok nga hinungdan han duha nga insidente hin pagpakamatay ha magkalain nga lugar ha probinsya han Leyte hadin nag-agi nga duha ka adlaw.
Ha report han Kananga PNP, ginkilala an biktima nga hi alyas “Nan”, 29 anyos, residente han Brgy Masarayao, Kananga, Leyte.
Ha inisyal nga imbestigasyon, nagpakamatay an biktima pinaagi hin paghigot hin pisi ha iya liog ngadto han kisame ha balay han iya amay banda alas 10 han aga, Agosto 4, 2022.
Antis ini nga panhitabo, an biktima in nagsumat nga dako an iya problema tungod kay iya daw nabisto nga may iba nga lalaki an iya kalungon. Nakakita daw an biktima hin mga litrato kun diin an iya kalungon in may upod nga lalaki nga nangangahigda ha katre.
Samtang, hadton Agosto 3, 2022, nahireport an paghikog ni alyas “Charl” ha Brgy Can-untog, Ormoc City.
Sumala han iroy han biktima, an 19 anyos nga iya anak in may problema ha “lovelife.”
An duha nga mga biktima in nadara pa ha mga hospital ha ira tagsatagsa nga lugar pero gindeklarar nga dead on arrival.
Waray naman nakita nga foul play an mga imbestigador dida han duha nga insidente. #
