Isumat.com/Hunyo 5, 2023
Namatay in duha nga gin-aalegar nga drug pusher han makigpusilay kontra han mga otoridad nga mag-aaresto unta ha ira ha anti-illegal drugs operation ha Brgy Apale, Isabel, Leyte, Hunyo 4, 2023.
An mga nagkamatay in ginkilala nga hira Zaidamen Langco alyas Abdul, nag-uukoy ha Brgy Poblacion, Kananga, Leyte; ngan hi Abdula Ismael, taga Brgy Urban Poor, Kananga, Leyte.
Hi Langco in numero uno ha Regional Priority Target, samtang hi Ismael in High Value target han PNP Regional Office tungod han ira paghilambigit ha iligal nga droga.
Alas 8 han gab-i han igkasa han mga operatiba han PNP Regional Drug Enforcement Unit ngan Isabel Police Station ha koordinasyon han PDEA-Region 8 an mao nga operasyon.
An poseur-buyer in nakapalit anay hin 5 ka sachet hin gintotoohan nga droga tikang han mga suspek, ngan dida han dadakpon na unta hira Langco ngan Ismael, bumunlot hira han ira pusil ngan nakigbalyu-ay hin bala ha mga otoridad.
Dida han pinusilay, nag-antos hin mga igo hin bala an duha nga suspek. Gindara hira ha klinika pero igindeklarar nga dead on arrival.
Narekupo han kapulisan an gin-aalegar shabu may timbang nga 115 gramos tikang han mga suspek, ngan ini in balor hin 782 Mil pesos. Nakuha gihapon han mga operatiba an mga armas de fuego nga gingamit han mga gintatahapan. #
