Isumat.com/7:53AM, October 22, 2020
Tungod hin pagkatkat ngan pagkuha hin baya o iti han mga tamsi ha lungib, maatubang hin kaso in pira nga residente han Brgy Caluwayan, Marabut, Samar.
Sumala han impormasyon tikang ha Marabut PNP Office, 15 katawo an ira pinandakop tungod han pagkuha han Guano. Ini amo an napoporma o natitirok nga baya o iti han katamsihan sugad han kabog ngan kulalapnit ha mga lungib. Nagsering an Marabut PNP nga an pagkuha ngan pagbaligya hini in igindederi han patakaran han Department of Environment and Natural Resources (DENR)
An guano in ginhihimo nga fertilizer. Epiktibo ini nga fertilizer kay hamurasak ni han mga minerales sugad han nitrogen, phosporuos ngan potassium. An pagkuha ngan paghimo hini nga fertilizer in kinahanglan hin permit ngan otorisasyon tikang ha DENR.
Naguguba an natural nga istraktura han mga lungib kun waray insakto nga kina-adman ngan pagkontrol tikang ha mga otoridad.
Nagsering an Marabut PNP nga mayda naghatag hin impormasyon ha ira nga maiha na ini nga natatabo, sanglit nagdumara hira hin operasyon hadton Oktubre 16 ngan na-aktuhan nira an grupo han mga suspetsado nga nagsusulod han sako ngan gin-aandam na nga igbiyahe an guano.
Iginbibiyahe ha Manila an nasabi nga mineral ug hinsabutan han PNP nga tag 30 pesos an kada kilo hini. Nakarekupo an kapulisan hin 500 ka sako han guano balor hin 1.5 Milyones pesos. An mga suspetsado in mga residente la mismo han nasabi nga barangay, pahayag pa han PNP.
Iginkustudiya han kapulisan an mga suspetsado, samtang nakatalaan paghakuton han mga personales han DENR an sinako-sako nga guano.
Nagsumat pa an Marabut PNP nga an usa nga lungib in na-imod na an guano, sanglit didto na han ikaduha nga lungib nagkikinuha an kalalakin-an han nasabi nga mineral.#
