Isumat.com/8:17AM, October 22, 2020
Wala-too ngan waray hunong an panmatay ha magkalainlain nga lugar ha Sinirangan Bisayas.
Hadin nag-agi nga pira ka semana, sunod-sunod an panggama ngan panmatay ha Tacloban, Palo, Calbayog, MacArthur ngan kakulop, Uktubre 21, usa nga lalaki an pinusil ngan namatay ha Baybay City.
Ginkilala an biktima nga hi Florence Dela Cruz, alias Renzy, 39-anyos, may asawa ngan residente han Brgy 11 han mao nga syudad.
Dida han inisyal nga imbestigasyon, an biktima in nagbabaktas ha Trenta de Deciembre St. didto han ira barangay han tigda la pagpusilon hin waray hikilal-i nga suspetsado nga sakay hin Sports Utility Vechicle nga Ford Everest. An nasabi nga behikulo in waray plaka.
An panhitabo in padayon gin-iimbestigar han mga kapulisan han Baybay.
Kun manunumduman, an mga suspetsado han naha-una nga panmatay in haros tanan sakay hin SUV.
Kasagaran liwat han krimen an iginkakanit ha iligal nga droga, pero tobtob yana waray la gihapon klaro nga resulta an imbestigasyon han naglolol-on nga mga insidente hin panmatay. #
