Isumat.com/7:35AM, November 11, 2020
An kaaway nga deri nakikit-an makaka-atraka gud bisan ano nga paghinirot labi na kun mayda tumagya ngan magkampante.
Ha pagbutho han pandemya han Covid-19, an probinsya han Eastern Samar in istrikto hin duro an mga patakaran labi na gud an pagpasulod hin katawhan tikang ha iba nga lugar. Kun igtatanding ha iba nga lalawigan han rehiyon, ura-ura hin kamakuti ngan kamukurimot an mga personales nga nagbabantay ha mga exit ngan entry points han probinsya.
Pero paghagos hin pito ka bulan, hinayhinay nga nagkamang an virus didto han probinsya ngan kakulop, Nobyembre 10, ginbunalan hin 75 nga bag-o nga pasyente han Covid an Este. Hapagkayana, maabot na ha 250 an Total Cases, sobra 100 an naka-recover ngan sobra 100 ka gatos an Active Cases yana. Lima naman nga Covid Patients an namatay didto han probinsya.
Kakulop, an bungto han Salcedo an may gidadamu-i an nahireport nga natapnan kay 23 nga residente han bungto an nagpositibo. Hi Mayor Melchor Melgar ngan pira nga opisyal han LGU an boluntaryo nga nagpa swab test tungod han posibilidad nga iginkahibalag hira han mga naha-una nga natapnan.
Nag-asoy hi Melgar nga negatibo an resulta han swab test ha iya ngan amo gihapon an resulta han Municipal Health Officer, drayber ngan hepe. Kasumpay hini, gin-aghat niya an mga bungtuhanon nga makigkoordinar ha LGU basi deri na magsarang pa an kagaw.
An LGU-Guiuan in nag-implementar hin Hard Border Lockdown tungod han paghitaas gihapon han kaso ha ira bungto. 16 an bag-o nga kaso ha Guiuan an nahipatik kakulop.
Katapos hin pira ka bulan nga Zero-Positive an bungto han Oras, mayda Health Care Worker ngan close contact niya an natapnan. Tungod hini, nag-implememntar hin granular lockdown an LGU ha pito nga barangay para han contact tracing.
An bungto han Maslog nga aadto ha “interior” an kinamumutangan, na-igo na gihapon han kagaw. Upat na nga residente an natapnan. Nagpahayag an LGU nga maghirot gud pagkinagawas han bungto labi na an iba nga deri naagi ha mga checkpoint tikang ha iba nga lugar tungod kay damo an puede agi-an nga dalan tikang ha kagugub-an.
Ha isla han Samar, naha-una nga nagdamo an positibo ha probinsya han Samar ngan padayon an paghitaas han numero ha Calbayog ngan Catbalogan. Ginsundan ini han Northern Samar ngan padayon pa an paghitaas han ihap labi na ha Catarman. Han nag-agi nga duha ka semana, an Eastern Samar naman an ginpupuntirya han ginkakahadlukan nga kagaw.
An Leyte, Southern Leyte ngan Biliran in na-obserbaran naman nga mayda paghabubo an Positive Cases.
Ha bug-os nga Eastern Visayas, 7.494 na an nagpositibo ngan 6,818 (90%) an naka-recover. An Active Cases yana (Nobyembre 11) in 605, ngan 71 nga pasyente han Covid an tumalikod ha kadayunan. #
