Isumat.com/8:52AM, November 11, 2020
Na-aresto han kapulisan in usa nga anay may kaso hin droga ngan usa nga inspektor hin bus ha magkalain nga buy-bust operation ha probinsya han Leyte, Oktubre 10, 2020.
An mga nadakop nga suspetsado dida han duha nga operasyon in ginkilala nga hira Florante Jade Ariza, taga Poblacion Dist 3, Barugo, Leyte; ug hi Nelson Dreu, residente han Atipolo, Capoocan, Leyte.
Pasado alas 4 han kulop han magdumara hin buy-bust an mga operatiba han Leyte Provincial Anti-Drug Unit ngan Barugo PNP kontra kan Ariza alias Tonton Astilla didto han iya barangay. Nakapalit hin usa ka sachet an poseur-buyer nga pulis ha suspetsado ngan kadagmitan ginkwelyuhan ini. Nakuha tikang kan Ariza in kadugangan nga upat ka sachet hin gintotoohan nga shabu ngan motorsiklo.
Subay han impormasyon, hi Ariza in nadakop na hadto ha paghidabi hin iligal nga droga pero nadismis an iya kaso.
Kakulop gihapon nga adlaw han pasado alas 9 han aga, hi Dreu in nasikmit han mga otoridad tikang ha Leyte Anti Drug Unit ngan Capoocan PNP. Hi Dreu, inasaw-an ngan bus inspector, in nakuhaan hin walo ka sachet hin gin-aalegar nga shabu balor hin syete mil pesos.
An duha nga suspetsado in temporaryo iginpaslak ha Municipal Police Station ha ira tagsatagsa nga bungto ngan nakatalaan sampaan han kaangayan nga mga kaso. #
