Kakarawaton nala hiton siyudad han Tacloban an mga nahuman na nga mga pabahay ha northern barangay bisan kon ini in mga sub-standard an kahimo.
Sumala kan Tacloban City Mayor Alfred Romualdez ini in agud maukyan na han mga biktima han bagyo Yolanda nga padayon pa nga na ngungukoy ha ligid han kadagatan nga pirme na ninilikado an mga kinabuhi kada mayda naabot nga bagyo sugad han Ursula.
Deri liwat karuyag sidngon kay kinakarawat na han siyudad an mga pabahay nga kumbinsido ini han ka trabaho han mga contractor.
Sumala pa kan Mayor Romualdez nga an siyudad nala an mag aayad o kon mag huhuman han pag trabaho hini pero maaro hiya hin bulig kan presidente Rodrigo Duterte ha panahon nga ma turn over na an pira nga mga housing projects.
Naka talaan nga mag meeting hi Mayor Romualdez ngan han mga opisyal han National Housing Authority (NHA) nga amo an nag patuman han mao nga proyekto parti han plano han Mayor.
Karuyag ni Romualdez nga ibutang ha pipirmahan nga memorandum of agreement an tinuod nga kabutangan han mga housing units san-o ini karawton han siyudad han Tacloban.
Waray pa bisan usa nga dida han 15, 000 housing units nga para han biktima unta han bagyo Yolanda an na turn over ha siyudad han Tacloban mahitungod han deri eksakto nga pag patuman han mao nga proyekto.
