Dos pesos na kada kilometro an pasahe kon masakay ka hin van tikang ha siyudad han Tacloban tikadto ha magkalain-lain nga lugar ha rehiyon otso.

Kon masakay ka tikang ha Tacloban tikadto ha Ormoc nga mayda distansiya nga 100 kilometers, 200 pesos na an pamasahe ngan deri na 140 o 150 pesos.

Ini in kahuman nga ipatuman han Land Trasportation Franchising and Regulatory Board an Memorandum Circular 2007-007 nga nag tatakda han mao nga kantidad han pamasahe.

Sumala kan LTFRB-8 Regional Director Gualberto Gualberto nga ira la guin aksyonan an petisyon han mga operator han mga van for hire nga ipatuman na an mao nga circular mahitungod han padayon nga pag umento han presyo han gasolina ngan mga spare parts han mga sarakyan.

Sumala pa kan Gualberto nga na ipatuman na ini nga circular hadton 2007 ngadto ha 2009 pero mahitungod han hangyo han publiko ngan han mga operator han van ngan guin tugutan liwat han LTFRB Director hadto nga mga panahon, guin balik la an tag 1.40 pesos kada kilometro nga sukot han pamasahe.

Ha ilarom han mao nga circular, an biyahe han mga van in kinahaglan nga “point to point” la karuyag sidngon deri tutugutan nga mag pick up hin mga pasahero ha bisan la diin nga lugar kundi diretso la ha terminal han destinasyon hini.

Labot la nga aircon an mga pampasahero nga van ini in may mga wifi ngan CCTV camera ka angayan la nga ipatuman na an bag-o nga taripa han pamasahe labot la nga an region 8 nala ha bug-os nga Pilipinas an waray pa mag papatuman hini dugang pa ni Gualberto.