Gin kakaptan yana hin usa nga taga Rehiyon Otso an dako nga responsibilidad nga pagpakurukusog ngan pagpa-uswag han football ha Central Visayas. Diri la ini ordinaryo nga trabaho kay an Central Visayas o Region 7 in usa han mga rehiyon ha Pilipinas kun diin ginkikilala nga duro ka importante an sports o pa-ugnat ha kusog ngan kun hin-o man nga tawo in mangungulo hin sports association hini nga lugar, dako gud ini nga pag-ayat hiton iya kapasidad.
Amo ini yana an gin-aatubang nga responsibilidad ni Engr. Rodney Libanan Orale nga amo iton presidente han Central Visayas Football Association (CVFA). An Central Visayas in gin kokomponer han Cebu, Bohol, Negros Oriental ngan Siquijor ug lakip denhi an mga syudad han Cebu, Tagbiliran, Mandaue, Talisay, Dumaguete ngan iba pa. In inga rehiyon in aada gihapon ha talaan han mga sports powerhouse han nasud.
An football in ginkokonsiderar nga major sport ha Cebu kun diin pirmi ini surok hin mga medalya ha Palarong Pambansa ngan dagko nga mga kompetisyon. Hi Orale in napili nga mangulo han asosasyon hadin nag-agi nga tuig ug mayda hiya 4-anyos nga termino ha pagdumara han grupo nga amo an gintu-inan han Philippine Football Federation (PFF) nga magkatin han mga football programs ngan proyekto ha bug-os nga Central Visayas.
Antis hiya nagin CVFA President, hi Orale in nagin chairman anay han kanan CVFA Referees Committee ngan dida han iya pagkapot hini nga posisyon hadto, iya nasaksihan an dako nga panginahanglan ha pag- upgrade han kapasidad han mga referees sugad man mga coaches. Sanglit, iya tatagan hin duon an pagadumara hin mga trainings ngan seminars para han mga referees ngan coaches.
Upod gihapon denhi an kadam-an nga mga football clinics ha mga eskwelahan ngan mga buru bungto basi mabaton an programa han PFF nga grassroots development program. Hi Orale in natawo ha Oras, Eastern Samar hadton 1972. Iton iya mga kag-anak in parehas Orasnon- hira Romulo Orale ngan Editha Libanan. Paghagos hin unom ka tuig, binmalhin an ira pamilya ha Catbalogan, Samar kun diin nagtrabaho an iya kag-anak. Ha Catbalogan na nag-eskwela hi Orale tikang ha elementarya tobtob han kolehiyo kun diin nagtapos hiya hin Civil Engineering ha Samar State University.
Han high school student pa hiya, nakagmulay hiya ha EVRAA komo football player. Iya iginsumat nga han pagtikang niya pagmulay hin football waray pa nira sapatos ngan naghimo la hin improvised shin guard tikang han plastic nga motol oil container. Nahingadto hiya ha Cebu ha pangita hin pakabuhi komo enhinyero ngan didto na gihapon nagka-asawa, ngan ha paghagos hin pira ka tuig nga panlimbasog, nagin usa na hiya nga kilalado nga nagdudumara hin construction company.
Hi Orale upod an iya misis ug tulo nga mga anak in nag-uukoy ha Inayawan, Cebu. An ira suhag nga anak, hi Erich Rafael in nagin miembro na han Under-19 RP team ngan kaapi yana han kanan University of Santo Tomas football team, samtang an ikaduha nga anak, hi Carlos Miguel in miembro naman han Don Bosco School-Labangon Cebu football varsity. Ha dugo ngan pamilya, aada gud an ira gugma han football, sanglit ini an ginhuhugutan hin kusog ngan inspirasyon ni Orale ha iya hingyap para han padayon nga paglangbo han nasabi nga mulay ha Central Visayas. # (KEVIN SIOSANA)
