COVID-19 update.

Waray na face mask o surgical mask nga ginbabaligya ha mga farmacia ha Tacloban City. Ini an nagin pahayag ni Diane Quiza han Department of Trade and Industry ha aton dapit.

Nagsering hi Quiza nga dida han ira inspection nga gindumara ha mga drugstore kakulop, Marso 12, nasabutan nga waray na stocks an mga tindahan han face mask. Nagpahayag an mga nagdudumara han mga botika ngan tindahan nga nag-order na hira ha mga suppliers pero naubusan liwat hini nga produkto an mga suppliers.

Igindugang pa ni Quiza nga kulang na gihapon an stocks han alcohol ha mga tindahan. Kasumpay hini, nanawagan hi Quiza ha publiko nga deri pumalit hin damo nga alcohol ngan sanitizers basi masahid an katawhan nga makagamit hini. Sering pa han opisyal nga responsabilidad han mga kunsumidor nga deri magtinirok hin sobra kadamo nga prudukto ngan makabulig liwat ha iba.

Ginbabantayan gihapon han DTI an mga presyo yana han medical supplies ug ira dayon ginpapabaton an mga tindahan nga nagpapasulabi han presyo. #