Isumat.com/Abril 23, 2023
Iginbuyagyag han pwersa armada han Pilipinas nga waray klaro nga nagmamangulo han mga rebelde nga kumunista ha Sinirangan Bisayas yana nga mga panahon.
Ha pakighimangraw ni 8th Infantry Division Commander, Major General Camilo Ligayo ha mga taga media hadin nag-agi nga adlaw, iya iginbuyagyag nga nag-aalang in pira nga personalidad han kagi-usan kumunista han rehiyon nga tumukdaw komo lider han hugpo.
Ini in dara kay maaram an mga kumunista nga rebelde nga deri mahunong an militar paghalpat bisan hin-o pa an manguna han mao nga grupo.
Sering pa ni Ligayo, dako na an kapi-angan han NPA ha Eastern Visayas tungod han kadakop han Regional Secretary Ka Elay, ug an kamatay han higtaas nga opisyal nga hira Benito ngan Wilma Tiamzon ha Catbalogan hadin Agosto 2022.
Dugang pa denhi nga nagtikaluya an hugpo han tumalikod ha kadayunan hi CPP Founding Chairman Jose Maria Sison ha Netherlands hadton Disyembre 2022, sering pa ni Ligayo.
Andam gihapon an militar nga surapoon an bisan ano nga pagbulos han CPP-NPA tungod han pagkamatay han ira mga lideres.
Ginhihingita han AFP nga hul-os na matumba an NPA ha Eastern Visayas yana nga 2023.
Kasumpay hini, hi Ligayo in utro nanawagan ha mga rebelde nga sumurender na basi makab-utan na an kamurayawan ngan kauswagan han rehiyon.
Igindugang pa han heneral nga kun deri hira sumurender, segurado nga madadakop gihapon hira kay bisan ngani an higtaas nga lideres han kagi-usan in nag-kaaaresto na ug an iba in namatay ha mga engkwentro.#
