Waray sumunod han protocol an usa nga nursing attendant han Leyte Provincial Hospital (LPH) hinungdan han posible nga katapni han 4 nga mga health workers han covid virus.
Ini an guin sumat ni Dr. Lesmes Lumen an Provincial Health Officer han Probinsiya han Leyte ha interview han isumat.com.
Sumala pa kan Dr. lumen nga nakig istorya an mao nga nursing attendant han usa nga pasyente nga positibo han covid nga waray sul-ot nga Personal Protective Equipment nga usa nga pag talapas han patakaran nga guin takda han Department of Health ngan han hospital.
7 han mga nag positibo han covid nga mga taga Alangalang Leyte an guin dara ha LPH mahitungod han ka kulang na hin lugar nga pag bubutangan hini haira didto han mao nga bungto.
Kasumpay hini nga pan hitabo ngan mahitungod hiton padayon nga pag saka han kadamoon han mga taga leyte nga nag kakaada han virus, guin aandam na an quarantine/isolation facility han probinsiya nga nahi mumutang ha Leyte Academic Center gymnasium ha bungto han Palo ha panahon nga mag kulang na hin lugar an mga local government units nga pag bubutangan han ira mga pasyente sumala pa ka Dr. Lumen.
