Isumat.com/4:20AM, June 19, 2020

Nagkaka-urusa an mga kongresista han Eastern Visayas nga repasuhon o ig-review an implementasyon han Hatid Probinsya ha panuyo nga deri na magtikadamo pa an mga natatapnan han corona virus ha aton rehiyon.

Dida hin usa nga official statement, an mga miembro han kongreso tikang ha Region 8 in nanawagan ha National Government nga manginano ngan bag-uhon kun kinahanglan an proseso nga ginsusunod ha pagpabalik han mga na-stranded nga katawhan ngadto han ira tagsatagsa nga probinsya. Sumala han mga magbabalaud, nakawang la an sobra duha ka bulan nga pag-istrikto han mga LGUs ngan haros waray nag positibo han virus, pero han magtikang na an Hatid Probinsya, nagsusunod-sunod na an natatapnan.

Hapagkayana, umabot na ha 342 katawo an natapnan han virus ha Region 8 ug ginkakabarak-an nga masaka pa ini nga ihap kun waray mga reporma dida han Hatid Probinsya. Nagsering an mga kongresista nga kinahanglan igpa-ilarum anay hin swab test ngan negatibo an resulta antis pabalikon an mga na-stranded ha ira lugar.

Nanginyupo gihapon an grupo ha Department of Health nga buligan an DOH-Eastern Visayas pinaagi hin bastante nga supply hin PPEs, kadugangan nga pondo para han Quarantine Facilities, paghimo hin processing center nga para la han mga nagkakabalik ngan iba pa.

Ginklaro han mga kongresista nga abri an Eastern Visayas pagkarawat han mga Returning Residents ug ira ginrerespeto an katungod nga bumalik ha ira lugar, pero kinahanglan igrespeto liwat an katungod han mga pamilya ngan publiko nga deri matapnan han kagaw.

An nasabi nga pahayag in pinirmahan nira Leyte 1st Dist. Cong. FM Romualdez, Tingog Party-list Rep. Yedda Romualdez, Northern Samar 1st Dist. Cong. Paul Daza, Northern Samar 2nd Dist. Cong. Jose Ong Jr, Leyte 3rd Dist Cong. Vicente Veloso, Samar 1st Dist. Cong. Edgar Mary Sarmiento, Leyte 4th Dist. Cong. Lucy Torres-Gomez, Samar 2nd Dist Cong. Sharee Ann Tan, Leyte 5th Dist Cong. Carl Nicolas Cari, Eastern Samar Cong. Maria Fe Abunda, Southern Leyte Cong. Roger Mercado ngan Biliran Cong. Gerardo Espina Jr. #