Isumat.com/Enero 5, 2022
Nagpasamwak hi Tacloban City Vice Mayor Sambo Yaokasin nga an konseho han syudad in nagpasa hin resulusyon nga iginpadangat ngadto han natutungdan nga mga ahensya may panuyo nga igrekonsiderar an pag-implementar han duro ka hitaas nga pag-umento han taripa hin pira nga mga produkto nga naagi ha Port of Tacloban.
Ha pakighimangraw ha iFM-Tacloban, nagsering hi Yaokasin nga nakarawat na han Philippine Ports Authority ug an pribado nga operator han pantalan nga amo an Global Port an nasabi nga resolusyon. Kun aton manunumduman, maabot ha 200 tobtob 400 porsyento an umento han taripa han fertilizers, semento ngan tubong tikang pagkaptan han Global Port an operasyon han pantalan.
Nagsering an Bise-Alkalde nga iginkahimangraw na hiya han pira nga opisyales han Global Port ug nagpahayag an nasabi nga mga personales nga abri hira nga makig-istorya ngadto han mga negosyante nga nadadabi han mga produkto nga nag-umento an taripa.
Dida han mao nga interview, hi Yaokasin in nagsering nga waray umento han taripa han bugas ngan iba pa nga mga epektos, an naghitaas an kabaraydan amo la an fertilizer , semento ngan feeds.
Igindig-on han nangungulo han Sangguniang Panglungsod nga kinahanglan mapanalipdan an interes han mga konsumidor kay hira an grabe nga apektado kun nag-uumento an mga taripa kay an mga negosyante in magpapatong manla hin umento ha presyo.
Kun umentado an mga taripa, waray mahihimo an mga negosyante kundi an pagpahitaas liwat han presyo, pahayag pa han opisyal. Hinungdan hini, iya iginpatapod nga hihimoon han konseho an ira obligasyon nga maproteheran an mga consumers.
Labot la han isyu han umento ha taripa, iginproponer gihapon ni VM Sambo ha nagdudumara han pantalan nga himoon nga 24-oras an operasyon basi an iba nga mga negosyante in makaghakot han mga produkto tikang ha Pier ngadto han ira mga bodega ngan tindahan bisan gab-i na ngan maagahon para deri ma-apektaran an trapiko labi na gud ha downtown area han Tacloban. #
