Isumat.com/Disyembre 27, 2021

Magagamitan la gihapon an mga Covid Vaccine nga nakahipos ha Southern Leyte bisan kun grabe nga ginlapingpa ni Bagyo Odette an nasabi nga probinsya, pahayag han DOH-Regional Office.

Sumala kan Dr. Mark Capungcol han DOH-8, waray nadistroso nga mga bakuna dida han bagyo hadrin Disyembre 16, 2021.

Katapos han bagyo, ginbarak-an nga mayda nagkadadanyos nga mga bakuna, labi na an didto ha bungto han Pintuyan kay naguba an Rural Health Unit han mao nga bungto kun diin ginhihipos an bakuna.

Nagsering hi Capuncgol nga bisan kun naguba an building han RHU ngan nawarayan supply hin kuryente,l gumana an solar panel sanglit nagpabilin nga na-preserbar an mga bakuna.

Igindugang pa ni Capungcol nga lima ka adlaw katapos han bagyo, kadam-an nga mga LGU ha Southern Leyte in bumalik na ha panmakuna han ira mga residente.

Iginreport gihappon han opisyal nga pira nga mga District Hospitals ngan RHU in nagkaruruba, sanglit deri pa hira nakakabalik pagserbisyo ha publiko. Pero an Provincial Hospital ha Maasin City ngan iba nga District Hospital in kadagmitan nagpadayon han ira operasyon.

An DOH in nagpapadayon gihapon paghatag hin medesina ngadto han apektado nga mga lugar labi na gud an kontra tetanus, diarrhea ngan maintenance medicines, pahayag pa ni Capungcol. #