Isumat.com/1:10PM, August 10, 2020
Namatay an duha ka tawo han aksidente nga mabangga han van nga sinasakyan han mga operatiba han Philippine Drug Enforcment Agency (PDEA) an ira balay ha Brgy San Juan, Sta Rita, Samar kakulop han maagahon (Agosto 9, 2020).
Subay han impormasyon nga nahikay han Isumat.com, an tulo nga ahente han PDEA in nagabibiyahe tikang ha Manila tipakadto unta ha Mindanao para hin usa nga operasyon. Banda ala-1 han maagahon, samtang ginsusulsog han van an national highway, nawarayan kontrol han manibela an drayber ngan gumawas ini han kalsada ngan gintumbok an balay han mga biktima. Hadto nga panahon, makusog an uran ngan madalunot an kalsada.
Ginkilala an mga namatay nga hira Jessie Pacle, 37 anyos, ngan Jowalyn Kiskisan, 27 anyos. An mga biktima in mag live-in partner nga nag-uukoy dida han gintudol nga balay. Tungod han kamakusog han impact, binawi-an hin kinabuhi hira Pacle ngan Kiskisan.
Nagkaada naman hin fracture an usa nga PDEA agent ngan kinahanglan igpailarum hin operasyon. An duha pa nga iba nga iya kaupdanan in nakagawas na ha hospital tungod kay minor injuries la an ira gin-antos.
Sumala pa han report, nagkasabot na an pamilya han mga biktima ug an PDEA nga an ahensya amo an magbabaton han ngatanan nga kagarastusan. #
