Isumat.com/2:29PM, June 5, 2020
Usa pala ka oras an nakalabay, iginreport han DOH nga mayda taga Leyte, Leyte nga nag positibo han corona virus. Iginpapadayon yana an contact tracing basi matudlok pa an iba nga posible iginka-urusa hini nga lalaki nga 42 anyos.
Nagpahayag hi Mayor Arnold James Isidoro han nasabi nga bungto nga ini nga lalaki deri amo an driver han van nga ginsakyan ni EV Patient# 45 nga taga Naval, Biliran. HIya in nahilakip la dida han contact tracing ngan ginkuhaan hin swab samples hadin Hunyo 3 ngan positibo an resulta. Taga Brgy Makupa ini nga lalaki pero driver gihapon hin Public Utility Vehicle.
Sumala pa kan Isidoro nga an nagmaneho han van nga ginsakyan han taga Naval in tikang ha iba nga bungto ngan naka-isolate na yana ngan nagpapamulat han resulta han confirmatory test.
An alkalde in nagsering pa nga an mga close contacts hini nga ira residente in aadto na yana ha Community Isolation Area ngan ginkuhaan na gihapon hin samples.
Dara hini nga impormasyon, ginkakabarak-an nga posible mayda pa iba nga tawo nga matapnan an taga Naval kay unom ka tawo an iya upod nga nagbyahe hin pribado nga behikulo tikang ha Manila ngadto ha Catbalogan. Nag-istambay pa hiya ha Catbalogan antis sumakay na liwat para ha Tacloban. Naghigda pa hiya hin usa ka gab-i ha Tacloban antis umuli ha Biliran sakay han passenger van hadton Mayo 27. #
