Waray gin-isa nga tsunami alert an Philippine Institute of Volcanology and Seismology (PHIVOLCS) kasumpay han linog nga natabo alas 5:19 han maagahon, Marso 2, kun diin an sentro in didto harani ha Capoocan, Leyte.

Sumala han Phivolcs-Palo, Leyte Station, an epicenter han linog nga mayda magnitude 5.7, in natabo ha katunaan ngan deri ha kalalawdan salit waray hira magpagawas hin tsunami alert.

Samtang, tobtob han ginsusurat ini nga notisya, nagpapadayon naman nga gin-aabat an mga aftershocks ha paghagrani nga mga lugar sugad han Villaba, Tabango, ngan Leyte, Leyte.

Ha bungto han Capoocan, padayon nga naginginano an mga opisyales kun mayda ba nadanyos nga mga propyedad o nagkaada hin karamtan ha lawas mahitungod han pagbay-og.

Dida han sapit nga bungto han Carigara, nagdeklarar an LGU hin suspensyon han klase yana nga adlaw basi magdumara anay hin inspection ha mga istruktura agud maseguro nga talwas ini gamiton.

Gin-abat ha Tacloban City, Pastrana, Kananga, Villaba an Intensity 5 nga kakusgon han linog. Labot la han mga munisipalidad han Leyte, an linog in gin-abat gihapon ha pira nga parte han Southern Leyte, Northern Samar, Samar, Eastern Samar ngan Cebu.

An epicenter han linog in may kahiladmon nga 13 kilometros ngan an kawsa hini amo an tinatawag nga tectonic in origin. #