Isumat.com/Hulyo 19, 2023
Ginpapaningkamutan han Bureau of Fisheries and Aquatic Resources (BFAR) nga umuswag an kapasidad han mga mangirisda hin tuna ha Eastern Samar nga magreresulta han pagtikadako han ira produksyon.
Ini in pinaagi hin duha nga dagko nga barko hin pangisda nga ighahatag han BFAR ngadto han tuna catchers han probinsya.
Ha notisya han Philippine News Agency, iginsumat ni BFAR Eastern Visayas Director Hannibal Chavez nga duha nga grupo hin magirisda ha Sinirangan Samar an igpapailarum hin training hiton Agosto basi mahibaro hira han pagdumara han fiberglass fishing vessel nga may kahilab-on nga 62 pies.
Ini nga mga sarakyan pandagat in kumpleto han ekipahes ngan makinarya, pahayag pa ni Chavez.
Igin-esplikar ni Chavez nga an proyekto in papatikangan na yana nga tuig. Ha syahan nga tuig, an operasyon han sarakyan in pagdudumaraon la anay han BFAR, ngan ha takna nga magin batid na an mga mangirisda ha pagkapot han sarakyan, igtutubyan na ini ha ira, pero padayon an pag-monitor han BFAR.
An kada usa han fishing vessel in may lakip nga upat nga catcher boats o gurugudti nga sakayan nga amo an mabulag ha mother boats basi manakop hin tuna ha Pacific Ocean.
An nasabi nga mga fishing vessel in puede makahipos hin duha ka tonelada hin isda ha lawod antis bumalik ha pantalan.
Iginpahayag pa han BFAR nga an makaka-agom hini nga proyekto amo in duha nga grupo hin mangirisda ha Guiuan ngan Balangkayan.
Kun magkamay-ada na hini nga dagko nga nga sakayan, segurado magtitikadamo an madadakop nga tuna han mangirisda. Hapagkayana, deri nakakapailawod hin duro an mga mangirisda kay na-iimod dayon an ira dara nga suplay hin pagkaon, tubig ngan yelo.
Ha Eastern samar, deri gud dako an industriya han tuna fishing hapagkayana kay gudti man an ira mga sakayan ngan naghihinulat la nga may makawil nga tuna ngan deri nakakabiyahe ngadto han higlarom nga parte han Pacifico. #
